g. Helena Petronella VAN DER WESTHUIZEN, geb. 14/12/1861

g. Helena Petronella, geb. 14/12/1861, Groot Kruis, dist. Oudtshoorn, oorl. 15/09/1934, The Towers, Oudtshoorn x 14/06/1881, Oudtshoorn met Gert Cornelis OLIVIER, geb. 09/09/1837, Welgevonden, dist. Oudtshoorn, oorl. 06/05/1922, Welgevonden, dist.Oudtshoorn, s.v. Gerrit Cornelis Olivier en Maria Susanna Greeff.

Helena Petronella was die dogter van Johannes Diederik van der Westhuizen en Maria Johanna Terblanche.

Gert Cornelis trou in 1859 met Beatrice Latergan van Buffelbosfontein.  Hulle bly op ‘n gedeelte van Welgevonden. Na Beatrice se dood op 12 Maart 1881 trou hy met die 20 jarige Helena Petronella (Lenie) van der Westhuizen, blykbaar ‘n baie eksentrieke vrou. Dogter van Koos Jintelman van der Westhys van Oude Muragie.

Gert Cornelis Olivier (09.09.1837 - 06.05.1922)

Gert koop drie jong volstruise van ene Mostert van Beaufort - hy en sy swaer Mattheus van der Westhuizen vang ook wilde volstruise – en so begin ‘n sprokiesverhaal vir die Oliviers.  Met sy dood in 1922 was hy met 5000 volstruise die grootste volstruisboer ter wêreld.  In 1872 koop hy ‘n deel van die plaas Armoed en daarna die een plaas na die ander soos die volstruisveer bedryf blom. Hy word die grootste grondbesitter in Oudshoorn, met ook 84 erwe in die dorp en eiendom by Hartenbos en Voorbaai.  In 1896 is hy betrokke by die bou van die brug oor die Grobbelaars River: Die Juta Olivier Brug.  In 1900 is hy ‘n Parlementslid van Oudtshoorn.

Gert Cornelis bou die bekende Olivier Towers in Wesbank langs die Grobbelaarsrivier – die swierigste van al die volstruispaleise – teen ‘n destydse ongelooflike 25 000 pond.  Dit is ontwerp deur Charles Bullock en beslaan 20 vertrekke en meeste boumateriaal word ingevoer uit Europa. Cecil John Rhodes, hoofregter Henry Juta, regters en volksraadslede was gereelde gaste.

The one that got away noem die C.P.Nel Museum "The Towers", die volstruispaleis wat Gert Olivier in 1895 vir hom laat bou het, want dit is natuurlik in die middel 1960's gesloop. (https://www.wikitree.com/photo.php/4/42/Olivier-10.jpg)

Ongelukkig bring die skielike volstruis-rykdom ook hier die lelikste in die Afrikaner uit: verwaandheid, snobisme en ‘n gejaag na aardse besittings.  Gert Olivier, of soos sy vrou Lenie hom graag op Engels genoem het, Ghirt,– was alte danig met die Engelse konings, onthou Mabel Olivier:  “Sien, ant Lenie was verlanges familie van ons.  Haar pa was mos nou Koos Jintelman van der Westhys van Oude Muragie.  Maar sy kon kamtig nie Afrikaans praat nie. Dis hoekom hulle sulke groot Sappe was. Hulle was mos dikkedensies met Rhodes ook.”

Gou moes besoekende familie by die agterdeur gaan aanklop, die “tradesman entrance”. In die NG Moederkerk koop die ryk volstruisboere hulle eie kerkbanke wat hulle Sondae vol hoogmoed betree.

Klein Ockert is na ‘n skool in Engeland gestuur waar hy later met ‘n Skotse meisie getroud is, sy studies aan Oxford voltooi en ‘n joernalis word en heeltemaal afgeleer om Afrikaans te praat.  Emily is na Gunesbury se afrondingskool in Londen gestuur deur bemiddeling van Hoofregter Juta (sy eggenote was die suster van Karl Marx, die vader van kommunisme.  Gedurende die volgende agt jaar loop Emily al wat ‘n kursus is in Frans, Italiaans, Engels en Duits, musiekonderrig en perdry klasse.  Vakansietye geniet sy pieknieks by Groote Schuur saam met Uncle Cecil John Rhodes.  Met haar terugkoms is Emily se trourok in Brussels ontwerp.  Die Hertog van Connaught en Prinses Alice het agter in die bruidskoets gery, gevolg deur Rhodes en Juta, die ander volstruisbaronne en toe die volksraadslede.

Louis Lategan het later verhaal: “In daardie jare was dit net Gert Olivier, die Rhodes-kliek, Rykpiet Lategan, Jan Schoeman, Attie Fourie en Gert le Roux wat mekaar gegroet het”.

(https://www.wikitree.com/photo.php/8/8b/Olivier-1226-1.jpg)

Dat alles tot stof vergaan, het ook waar geword vir die Olivier Towers. Erfgenaam Piet het probleme opgetel en die eiendom verkoop aan die Departement van Onderwys. Dit is later so verniel deur koshuisgangers van die Oudshoorn Opleidingskollege dat dit gesloop is en die nuwe hoërskool is daar gebou.  (https://www.wikitree.com/wiki/Olivier-1226)

Die laaste rusplek vir Gert Cornelis Olivier en sy tweede vrou Helena Petronella van der Westhuizen. Die perseel waarop die Hoëskool Oudtshoorn vandag gebou is was die plek waar "The Towers", woning van Olivier eers gestaan het.  (https://www.wikitree.com/photo.php/1/13/Olivier-11.jpg)

Kinders:

h.1.  Magdalena Johanna OLIVIER, geb. 17/05/1883, oorl. 1961, Oudtshoorn x 1905 met Stanley Elley, geb. 17/02/1879, Walton, Berkshire, Engeland, oorl. 14/04/1941, Oudtshoorn

h.2.  Ockert Johannes OLIVIER

h.3.  Burgert Diederick Eric OLIVIER, geb.  24/11/1887, Oudtshoorn, oorl. 01/06/1925, Kaapstad x 14/03/1923, Aliwal-Noord met Frances Lilian Margaret Wheeler

h.4.  Emily OLIVIER x Matthew Heyns

h.5.  Cornelius Petrus OLIVIER