Johannes Izak was die seun van Abraham Pieter Nel en Hendrina Maria Hendrikse.
Hierdie laatlammetjie van die familie is in 1907 gebore. Hy was ‘n kort man met ‘n egalige geaardheid. A.D. Malan het vir Izak en Piet beskryf as dierbare en sagte mense. Izak was ook ‘n dinamiese man met ‘n sterk selfbeeld en mening.
Izak is met Anna Jacoba Kruger getroud. Mias se seun Mias het baie tyd saam met sy
ooms deurgebring en het selfs saam met Izak gery wanneer hy by Annie op Samoep
anderkant Pofadder gaan kuier het vir ‘n naweek. Izak en sy bruid het in 'n tent gewoon terwyl hulle huis gebou is.
Izak was lief vir jag en was ‘n baie goeie skut. Hy en sy broers het die wild na ‘n jagtog
sorgvuldig bewerk en biltong en wors gemaak.
Oor die wors se maak was daar redelike meningsverskille. Ben en Kolie het altyd die grootste
meningsverskille gehad. Izak en Piet het
weer die vrede herstel. Izak en Piet was
baie na aan mekaar en hulle het die meeste by mekaar gekuier.
Izak was baie
netjies as persoon, op sy besitings en op sy plaas. Hy het alles wat hy gehad het met liefde en
sorg hanteer en was trots daarop. Hy het
van mense gehou en het graag onthaal.
Van al die broers was Kolie en Izak die grootste
platjies. Hierdie twee broers het nie gehuiwer om in die regte gees en in
die regte omstandighede, ‘n ander ‘n poets te bak nie. Buiten daarvoor dat Izak graag grappe gemaak
het, kon hy ook goed stories vertel, soos A.D. Malan dit stel “ombruikbare
stories”.
Op 3 Julie 1968 is Izak dood aan ‘n hartaanval. Tobie Hanekom, wat pas op die plaas gejag
het, het Izak se begrafnis waargeneem. Hy
en Izak was neefs en het ‘n baie sterk band gehad.
Northern Cape, Gordonia district, Augrabies Padrooi 13 Nel cemetery
Northern Cape, Gordonia district, Augrabies Padrooi 13 Nel cemetery
